Friday, June 25

साढे २ किलो विस्फोटक पदार्थ युरेनियमसहित ४ जना पक्राउ

March 12, 2021 182

काठमाडौँ– प्रहरीले साढे दुई किलो विष्फोटक पदार्थ युरेनियमसहित ४ जनालाई पक्राउ गरेको छ । महानगरीय प्रहरी कार्यालयका अनुसार काठमाडौंको बौद्धबाट लुकाएर राखिएको अवस्थाको युरेनियमसहित चार जनालाई पक्राउ गरिएको हो ।

कार्यालयका प्रमुख एआईजी हरिबहादुर पालले भने, ‘बौद्धमा भण्डारण गरिराखेको अवस्थामा युरेनियम बिहीबार बरामद भएको हो । जफत भएको युरेनियमको मूल्य ५ अर्ब रुपैयाँभन्दा बढी हुन आउँछ ।’

प्रहरीले बरामद गरेको यति ठूलो परिणामको युरेनियम नेपालमा पहिलोपटक हो । प्रहरीका अनुसार बरामद युरेनियम २ सय ३८ क्यारेटको हो ।

पक्राउ परेका अभियुक्तले बयानमा २० वर्ष अघि नै भारतको एउटा खानीबाट युरेनियम ल्याएको बताएको प्रहरीले जनाएको छ ।

पक्राउ पर्नेमा रामेछापको लिखु तामाकोशीका ४० वर्षीय नारायण सिंह तामाङ, ४० वर्षकै जानुका तामाङ, रामेछापकै बागजोरका २० वर्षीय प्रकाश चौहान र सिन्धुलीका २० वर्षीय मनोज न्यौपाने रहेका छन् । पक्राउ परेका चारै जनामाथि विस्फोटक पदार्थ ऐन २०१८ बमोजिम ५ दिन म्याद थप गरी अनुसन्धान भइरहेको प्रहरीले जनाएको छ ।

के हो युरेनियम ?

प्रहरीका अनुसार अहिले जफत भएको युरेनियम प्राकृतिक युरोनियम हो । यो पारमाणविक भार भएको रेडियोधर्मी धातु हो । यसलाई सबैभन्दा मूल्यवान धातुका रुपमा लिइन्छ ।

जानकारहरुका अनुसार युरेनियम परमाणु संख्या ९२ भएको एक रासायनिक तत्त्व हो । युरेनियम प्रकृतिमा पाइने तत्त्वमध्ये सबैभन्दा बढी २३८ पारमाणविक भार भएको रेडियोधर्मी धातु हो ।

लगातार ऊर्जावान् विकिरणहरु फ्याँकिरहने भएकाले यसको आयु सयौँ वर्षसम्म हुन्छ । नेपालमा पेग्माटाइट र ग्रेनाइटजन्य चट्टानमा युरेनियम पाइएको छ । बालुवासँग मिश्रित युरेनियमको मात्रा विश्वमा ५० प्रतिशत बढी पाइएको विभिन्न अध्ययनले देखाएको छ ।

विशेषज्ञहरु युरेनियम पत्ता लगाउन जीएम काउन्टर, सिन्टिलेसन काउन्टर आदि संयन्त्रको सहायताले विकिरण शक्ति मापन गर्छन् । यही विकिरणको मापनद्वारा नै युरेनियमको भण्डारका बारेमा यकिन गर्न सकिन्छ ।

भर्खर

प्रतिकृया दिनुहोस्